Puisi Bali Anyar

KATIBEN LARA

Minab lacur i dewek numadi
ring jagat lintang mabudi
sarwa wiguna tan pati
karahayuan sane kaapti

lian sareng i dewek mangkin
satata kalurug duhkita
sarwa lepet ngebekin
ngawi sekancan lara

minab padumanring marcapada
satata mondong sengsara
tan keneng ben ngarsa
idup stata katiben lara

indayang pinehang
sami resepang
idupe tan luputing suka, duka, lara, pati...


                                                                    puput sinurat, sukra kliwon madangkungan warsa 2012
                                                                     Olih: Gus Antara

KAHANAN JAGAT

Langite kasaputin gulem,

Masemu sekadi anak ngadesem,

Sekadi manah titiange remrem,

Nyingakin gumine serem.

Peteng lemahe mamargi gelis,

Sekadi pajalan angine aris,

Tanpa suara tan pakeling,

Ngasorang sakancan maurip.

Idup di gumine wayah,

Alep ayu ring pratingkah,

Kaduluring sucining mamanah,

Mangda adharmane nenten katah.

Rereh jagat sane rahayu,

Dasaring antuk tingkah ayu,

Tutur agamane patut tiru,

Mangda prasida sekadi I Guru.

Elingan....

Resepang....

Laksanayang....

                                                                                    olih: Gus  Nirdon

DEDALU

Grudugan langite ne masuara egar,

Latrine peteng dedet,

Katangkebin antuk guleme situ,

I blabur.....

Sampun tingkeb saking meghane ,

Ngawinang belus ya i pertiwi,

Ngetisin gumi....

Nayuhang gumi ring kapanesan.

Sarwa gumatat-gumitite ne mamunyi,

Nembangin sakancan gagendingan rasane,

Suaran i godogan ne macandetan,

Nglangunin manah sang mirengang,

I dedalu sareng ya mangigel,

Nuutin suaran i godogan,

Ngiterin sarwa endih,

Sane masunar ring wengine,

Sinah ipun pada girang macanda,

Nanging........

Minab sungsut manah i dedalu,

Kasuen-suen ya mangindang,

Kampid ipun tatas aas...

Pamuput nemuang padem,

Napi puaran tityang manumadi?,

Ne tanpa aji rasayang tityang.