Pidarta basa Bali

MALARAPAN HARDIKNAS TINCAPANG SWADARMANING AGURON-GURON

Inggih maka purwaning atur, titang pinih riin  tan sep ngastiti bakti ring Ida Sang Hyang Widhi Wasa,dumadak sangkaning asung kerta wara nugrahan Ida nemu karahajengan, malarapan antuk uncaran puja pangastungkara: 

Om swastyastu.

Kapertama majeng ring angga panureksa pacentok pidarta basa Bali, sane wangiang titiang. Kaping kalih majeng ring  para pamilet pacentok mapidarta basa Bali, sane mustikayang titiang. Kaping tiga majeng ring ratu ida dane sane tan sida antuk titiang ngonek siki-siki sane dahat tresna sihin titiang.

Inggih ida dane sareng sami, ritepengan sekadi mangkin ida dane iring titiang masadu ajeng, gumanti wantah maosin parindikan nincapang swadarmaning aguron-guron. Sakemawon ampurayang pisan atur titiang puniki, satmakane titiang nangiang iratu ida danen titiang sampun matangi. Saantukan ritepengan sekadi mangkin rasa meled manah titiang matempung wirasa riparindikan maosin swadarmaning  aguron guron. Dumadak sida kacumpuin olih ida danen titiang, pamekas majeng ring para angga guru, lamakane sida kaanggen gegambelan rikala nincapang aguron-guron, yadyan ring sekolah utawi ring desa pakraman.

Inggih ida dane sareng sami, pamekas para angga guru sinamian, sajroning nincapang swadarmaning aguron-guron, iraga patut masuluh ring kawentenan aab jagat sakadi mangkin saha kaadungang ring kawentenan aguron-guron ring sekolah suang-suang. Yening sane dumun wenten carita kasurat ring lontar Adiparwa, pamekas ri parindikan Ida Bagawan Domya sang maraga dangacarya rikala nureksa para sisyan idane sane makatah tigang diri, makadi Sang Arunika,Sang Utamanyu, miwah Sang Weda,.maka tatiga satata ninutin, napi sane kapikarsa olih sang maraga guru. Iriki sane patut kauratiang ambil pikenohnyane wantah para sisyan idane satata satinut. Yan kamanah antuk  titiang wantah wibawan Ida Bagawan Domya sane ngranayang. Duaning kawidnyanan adnyanan Ida sane limbak turmaning ida dahat sutrepti ring angganida, Iriki suluh utama sane prasida kaketus marupa sutrepti ring angga sang maraga guru, (baos ketah:disiplin pada diri sendiri lebih dulu) sadurung nreptiang para sisyane. Seosan ring sutrepti, Ida Bagawan Domya maderbe kawruan katah. Indike puniki makanten rikala nureksa para sisyanidane malarapan antuk pituduh sane masios-siosan sadurung para sisyanidane kaicen aji kawruhan. Rikala punika sami sisyanida satinut kadulurin antuk pikayunan las carya.

Inggih ratu ida dane sareng sami, yaning saihang ring kawentenan aab jagate mangkin, sampun sepatutne sang maraga guru nreptiang angga pinih utama sadurung nreptiang anak tiosan. Upami: yan pacang maosang indik katreptian (kedisiplinan) sang maraga angga guru patut trepti (disiplin) rihinan,mangda sampun ngiwangang anak sios tan trepti. Inggih ,yan asapunika caranipun  nglimbakang angga sang maraga guru, dumadak sami pada prasida nincapang swadarma aguron-guron. .

Inggih ida dane sareng sami, pamekas para angga panureksa, seos ring sesuluh ring ajeng, wenten malih suluh ring kakawin Ramayana: “ragadi musuh maparo, rihati ya tonggwanya tan madoh ring awak” kabaos “sesenengan mwah sane lianan wantah meseh pinih tampek, wantah ring pikayun genahnyane nenten doh saking angga sarira”.Daging sastra puniki ngicenin suluh; sumangdene iraga sareng sami pada mulat sarira. Napi malih nganinin riparindikan dados guru basa,sapatutnya kaaptiang pisan maderbe kawruhan mabasa sane nyihnayan kawagedan. Duaning yan pet prade tan asapunika,sampun janten napi sane kabaos ring  kecap sastra “ring wwang tanwruha ring subasita mapunggung pangraseng sad rasa”, pacang nuek ring angga sariran sang maraga guru pangajian. Seos ring punika taler mangdane sengeh tur urati ring kawentenan sisya. Sane pinih utama pisan  tetep eling ring swadarma manados guru pangajian majeng ring sang maraga guru. Tetujonipun mangdane prasida ngamargiang “ing arso sung tulodo, ing madya mangun karsa, Tut wuri handayani”

                    

Inggih ida dane sareng sami, napi sane sampun uningayang titiang iwawu yan cutetang pisan; kapertama: patut sengeh ring aab jagat, kaping kalih: sutrepti ring angga, kaping tiga: mulat sarira, kaping pat: maderbe kawagedan, kaping lima: prasida ngrincikang, nglaksanayag saha nitenin pibuatanut dudonan,

                   

Inggih majeng ring angga panurek taler ida dane sareng sami, wantah asapunika prasida katur, mogi-mogi wenten pikenohnyane praya pacang angge nglanturang pamargi kapungkur wekas.Taler manawi te wenten munjuk lungsur atur titiang, tan sep titiang nunas gung rena pangampura, Dumadak pikayunan sane becik rauh saking dhik widhik. Titiang puputang antuk parama santi.

               Om Shanti Shanti Shanti Om